Lewoskryntno witamina C – prowda eli fulanie?

We medycynie a farmaceutyce tyż můmy roztomajte mody. Jedna ze takich niýdownych to ta na lewoskryntno witamina C. Niý roz we aptyce poradzi sie słyszeć, co pacjynt chce witamina C lewoskryntno i ýno tako. Żodnyj inkszyj. Je to ýno miyjske beranie, abo cosik prowdy jednako w tym je?

Prowda je tako, co ze witaminům C je jak ze naszymi rynkami. We jednyj kciuk můmy po prawyj a we drugij po lewyj. Tak samo witamina C mo grupa -OH. Roz je łůna po lewyj zajcie, a to dowo nům stereoizomer L, roz zaś grupa -OH je ze prawyj zajty, co zaś dowo stereoizomer D. A ôd tego zoleży, bo chymiczno aktiwność wykozuje ýno stereoizomer L, czyli znany kwas L-askorbinowy.

Jednako jako to je z tům skryntnościům? A w sumie barzi ze skryncalnościům witaminy C?
Kejby bez uozpuszczůno substancjo witaminy C puścić spolaryzowane światło (czyli take kerego wszyske průmiynie lecům we jednym kierunku), to nosz kwas L-askorbinowy skrynciłby płaszczyzna polaryzacje światła we prawo. Tuż jak widać znano nům witamina C je tak po prowdzie prawoskryntno.

Jednako czamu na witaminie C we noszych aptyczkach můmy szrajbniynte, iże je łůna lewoskryntno?
Je to efekt mody na lewoskryntno witamina C. Producynty, a w sumie marketingowcy ekstra naszkryflali na ôpakowaniach, iże je to lewoskryntno witamina, coby lepij sie sprzedowała. Toć niý ôd dzisio wiadůmo, iże ludzie chyntnij kupujům to, co terozki je we modzie.

Prowda a rikszlus tyj historie je taki, iże werci sie dbać ô nosze zdrowie. Niý ma co jednako zbytnio wierzyć we moda, kero czynsto nakryncano je bez firmy marketingowe a farmaceutyczne, kere chcům, coby my kupowali to, co łůni nům pedzům. Suchejcie swojego uozsůndku, abo po prostu dejcie sie pedzieć farmaceucie, kery nojczynścij chce Wům dobrze doradzić.

Przełożył
Michał Baraniok